We dr Santschi...

We dr Santschi denn im Denner nid dä Seich hätt gmacht, wär die Gschicht mit de Gafferahmdecheli nie passiert. Derbi hets guet usgseh im Denner, sogar sehr guet, won er sech zum Brotbacher het ufegschaffet. Agfange aus Fronter. Aues fürezieh, e sueberi Front mache, dass d Waar schö parat steit, schön gfrontet isch, u das isch am Filiauleiter ufgfaue. E serige Fronter heig är no säute gseh, het dr Herr Dizdarevic gseit, und öber sech chönnt vorsteue, es Stägeli ufezstige, es Trittli uf dr Karriereleitere u ds Brot z übernäh.

Aus: Wortknall, edition spoken script, Verlag der Gesunde Menschenversand 2021